Vijimësi dhe risi në sistemin gramatikor të gjuhës shqipe: “Gramatikë historike e gjuhës shqipe” nga Kolec Topalli

Abstract

Vepra e fundit e Prof. Kolec Topallit “Gramatikë historike e gjuhës shqipe” (Tiranë, 2011, 1737 f.) është përfundimi dhe produkti i një pune disavjeçare në fushën e gramatikës historike të shqipes, të pasqyruar në katër monografi të plota për fushat më të rëndësishme të sistemit morfologjik të shqipes, siç janë “Përemrat e shqipes”, “Nyjat e shqipes”, “Sistemi rasor i shqipes në evolucionin historik” dhe “Sistemi foljor i shqipes në evolucionin historik”, tashmë të botuara ose në proces botimi. Ky vëllim kaq i madh pune është kryer vërtet për një periudhë të shkurtër, rreth pesëvjeçare, por duhet pasur parasysh se ai mbështetet në një përvojë mbi njëzetvjeçare studimesh në fushën e fonetikës historike, nga të cilat kanë dalë edhe mjaft të dhëna e risi që i takojnë gramatikës historike.