Çështja e mistifikimit letrar në veprën e Mitrush Kutelit

Abstract

Mitrush Kuteli është vetëm njëri ndër pseudonimet letrare që përdori Dhimitër Paskoja. Me të ai nënshkroi pjesën më të madhe të krijimeve të tij letrare, të gjitha prozat e tij. Jeta reale dhe jeta letrare e Dhimitër Paskos / Mitrush Kutelit krijojnë një dualitet të atillë, saqë duket se të dyja entitetet bëjnë një jetë të pavarur nga njëri-tjetri. Dhimitër Pasko ishte ekonomist nga formimi dhe profesioni, bankier nga nëpunësia, jetoi larg Shqipërisë, në Bukuresht (Rumani). Më pas, në Shqipëri, por larg vendlindjes, në kryeqytet. Mitrush Kuteli jetoi fizikisht në të njëjtat vende, por shpirtërisht rijetoi mbresa fëmijërie, fantazoi peisazhe të vendlindjes buzë “liqerit”, rievokoi përrallat e gjyshes dhe tregimet e mërgimtarëve në Rumani.