Vlera të reja për etimologjinë në një fjalor të Shqipes

Abstract

Ka kaluar më shumë se një vit qëkurse leksikografia jonë dhe bota shkencore shqiptare u pasuruan me një vepër të re, që është e rrallë në llojin e vet, “Fjalor i gjuhës shqipe” të Mehmet Elezit. Hartimi i një vepre të tillë, me përmasa jo të zakonshme, realizohet përgjithësisht nga grupe autorësh që punojnë për vite me radhë në institucione kërkimore të specializuara për këtë qëllim. Kurse hartimi i saj prej një individi, që ka punuar në kushte aspak optimale, kërkon sakrifica e privacione për vite e dekada, të cilat mund të bëhen vetëm kur ka një shtysë të fuqishme: dashurinë për gjuhën, për kombin dhe për vendin ku kemi lerë, si një motiv jete për të ruajtur identitetin kombëtar, trashëgimin kulturor të të parëve, atë që para botës na njeh si përfaqësues të një kombi të lashtë, me një gjuhë të vetën, me një shpirt e mendësi tonën.