Filologjia shqiptare dhe tekstologjia

Abstract

Botimet kritike të veprave të autorëve të mëdhenj dhe studimet e tyre tekstologjike sot janë një mungesë e madhe për historinë e letërsisë shqipe dhe për historinë e gjuhës shqipe. Filologjia shqiptare, me gjithë të arriturat e konsiderueshme, vazhdon të ketë mungesa të ndjeshme në disa fusha të saj. Ajo që i mungon filologjisë shqiptare janë studimet tekstologjike. Mungesa e studimeve tekstologjike dhe, përgjithësisht, e botimeve kritike e ka rënduar hartimin e një historie të plotë të letërsisë shqipe, shumë të nevojshme për filologjinë shqiptare dhe ka vështirësuar edhe studimet e tjera, sidomos gjuhësore e stilistike. Ka vështirësuar edhe vlerësimet historiko-letrare, kritiko-letrare, teoriko-letrare, krahasimtare, me një fjalë vlerësimet letrare-shkencore në përgjithësi.