Problemet juridiko-ndërkombëtare në njohjen e Kosovës

Abstract

Kosova, emër ky shumë i dëgjuar në mbarë botën. Por ç’është Kosova, ç’kërkon ajo, nga e ka prejardhjen dhe a e ka të drejtën ajo në kërkesën e saj për pavarësi? Për të arritur në këtë përfundim, jemi njohur me shumë opsione të cilat paraqiten për zgjidhje shkallë-shkallë deri në shprehjen e vullnetit të lirë të popullit shqiptar të Kosovës për të vendosur fatin e tij. Metodologjia që është përdorur gjatë hartimit të kësaj teme është mbështetur në pikëpamjet doktrinale që ekzistojnë në fushën e të drejtës ndërkombëtare për çështjen e Kosovës, në legjislacionet e Kosovës, të vendeve të rajonit dhe më gjerë në arenën ndërkombëtare, janë shfrytëzuar informacionet dhe literatura shkencore nga botimet në revista dhe konferenca shkencore që kanë trajtuar po këtë problematikë. Në këtë artikull trajtohet evolucioni themelor i procesit të njohjes ndërkombëtare të Kosovës si shtet i pavarur, përgjatë dekadave të fundit. Nën administrimin ndërkombëtar, pavarësisht vonesave të dukshme e devijimeve të shumta me natyrë subjektive dhe objektive, të brendshme dhe të jashtme, procesi demokratik në Kosovë ka pasur përgjithësisht një spirale ngritëse drejt konsolidimit politik, demokratik e institucional dhe statusit përfundimtar të vendit. Përfundimisht, u arrit që sipas deklaratës kushtetuese, Kosova të shpallet shtet i pavarur më 17 Shkurt 2008. Tashmë Republika e Kosovës është zyrtarisht një shtet i pavarur, neutral me një autonomi të gjerë duke pasur të gjitha të drejtat e një shteti.