Testet projektive grafike dhe zvillimi i kapacitetit grafik

Abstract

Objektivi i këtij studimi teorik është të paraqiten teknikat projektive grafike dhe zhvillimi i kapacitetit grafik te individi. Së pari, kjo trajtesë do të parashtrojë një panoramë të shkurtër ilustruese mbi teknikat projektive grafike dhe disa aspekte të dinamikave projektive që duhen pasur parasysh në vëzhgimin dhe në interpretimin e çdo lloj vizatimi të realizuar. Së dyti, do të fokusohemi në shpjegimin dhe eksplorimin e vizatimit në zhvillimin fizik, motorik, kognitiv dhe socio-emotiv në periudhat evolutive. Çdo arritje evolutive dhe çdo aspekt i personalitetit reflektohet hollësishëm në produktin grafik. Nëpërmjet fletës së bardhë tregohet marrëdhënia që çdo individ vendos jo vetëm me veten, por edhe me të tjerët, në familjen dhe në shoqërinë në të cilin ndodhet. Metodologjia e përdorur është ajo cilësore e zhvilluar në linjën e shqyrtimit të të dhënave të literaturës rreth çështjes në shqyrtim. Përgjatë kësaj trajtese, artikulohen një sërë gjetjesh të rëndësishme të lidhura pikërisht me rëndësinë e vizatimit për njohjen e gjithanshme të personalitetit dhe si zhvillimi i kapacitetit grafik pasqyron zhvillimin global të individit.