Dardanët

(Luan Përzhita, Dardanët), Tiranë: Akademia e Studimeve Albanologjike, Tiranë, 2022, 308 f.)

Résumé

Akademia e Studimeve Albanologjike në Tiranë, në vitin 2022, botoi veprën Dardanët, të studiuesit Luan Përzhita. Profesor Luan Përzhita është arkeolog që për një kohë të gjatë ka qenë drejtor i Institutit të Arkeologjisë, Tiranë, si dhe rektor i Akademisë së Studimeve Albanologjike. Veprimtaria e tij shkencore përfshinë një gamë të gjerë hulumtimesh e studimesh nga fusha e arkeologjisë. Kjo veprimtari është e përmbledhur dhe zbërthyer në shumë monografi e punime shkencore të publikuara brenda e jashtë vendit. Monografia Dardanët, është studimi i radhës, që profesor Përzhita i kushton dardanëve dhe Dardanisë, në mënyrë të përmbledhur nga prehistoria deri në mesjetë, mbështetur në të dhënat që i japin autorët antikë dhe materiali arkeologjik, ku vend të veçantë zënë rezultatet e kërkimeve dhe gërmimeve të kryera në vitet e fundit në Kosovë dhe territoret tjera, të cilat në antikitet ishin pjesë e Dardanisë, pjesë e disa prej këtyre hulumtime ishte edhe vetë autori.