Kumte për raportet e kanunit me ligjin

Abstract

Në fokus: drama klasiko-moderne “Loja e mbasdrekës” e Martin Camajt

"Loja e mbasdrekës" është një dramë klasiko-moderne, ndër më të fuqishmet e dramaturgjisë sonë kombëtare, e shkruar me kulturë, dije të thellë, me dialektin e bukur të gegërishtes, me stil të lartë dhe vizionin prej intelektuali e dramaturgushkrimtari të shquar, një dramë me mesazhe njerëzore dhe universale, e cila duke iu referuar realitetit të djeshëm në aspektin e gjakmarrjes, transmeton mesazhe inkandeshente për shoqërinë tonë në raportet kanun-ligj, duke trajtuar në veçanti shtrembërimin e dokeve dhe abuzimin me to, si dhe format e tjera abuzive mafioze, ku ligji i shtetit zvetënohet apo hesht.
Gjyqtari i ri, Gjormi, do të jepte këtë mesazh: "Për ju që lexoni këtë lojë (apo ndiqni shfaqjen në teatër - M.P.), një lutje: kur të mbeteni vetëm, sonte ose nesër, as fjalët gjak, gjakderdhje, zezonë dhe urrejtje, të mos ju bien ndërmend! Lëshojini përfytyrimet e hidhta në ujë të rrëmbyeshëm!” (“Loja e masdrekës”, Apollonia, Tiranë, fq.74, 1996).