MËSIMI I GJUHËS SHQIPE NË REPUBLIKËN E MAQEDONISË SË VERIUT

Mediat në rolin e shkollave

Résumé

Në kontekste ku e drejta për shkollim në gjuhën shqipe mbetet e kufizuar, siç është rasti i Maqedonisë së Veriut, mediat marrin një rol të rëndësishëm kompensues, veçanërisht në fushën e mësimdhënies së gjuhës. Përtej funksionit të tyre informues, mediat në gjuhën shqipe janë përfshirë në mënyrë aktive në misionin gjuhësor dhe edukativ. Drejtuesit e “Radio Shkupit” dhe gazetës “Flaka” kanë qenë të vetëdijshëm për këtë përgjegjësi dhe shpesh kanë përdorur hapësirat mediatike si “klasa” alternative për përvetësimin e shqipes. Të dy institucionet kanë krijuar rubrika të specializuara për promovimin dhe standardizimin e gjuhës, duke ndikuar në rritjen e ndërgjegjësimit gjuhësor të publikut shqiptar. Që në vitet ’70, “Flaka” kishte themeluar rubrikën “Ç’thotë profesori i shqipes”, ndërsa “Radio Shkupi” ka transmetuar rubrikën “Si e flasim gjuhën tonë” dhe emisionin “Gjuha jonë” (2022). Këto iniciativa dëshmojnë një traditë të qëndrueshme të përdorimit të mediave në funksion të edukimit gjuhësor – një mision që vijon edhe sot.