Përparësitë dhe efektet e rendit juridik komunitar

Abstract

Themelimi i Bashkimit Europian imponoi nevojën për të “konceptuar” një sërë aktesh legjislative të cilat duhet të rregullonin marrëdhëniet mes Unionit dhe Shteteve Anëtare, mes Shteteve Anëtare, si dhe statusin dhe marrëdhëniet e çdo individi në komunitet. Fillimisht, duhej të përcaktohej mirë dhe qartë natyra dhe efektet e legjislacionit të Komunitetit. Institucionet duhej të ishin në gjendje të harmonizonin në mënyrë efektive dhe të pavarur nga vullneti i Shteteve Anëtare, kushtet e ndryshme ekonomike, sociale dhe madje mjedisore. Kjo duhej bërë me anë të paketave ligjore në shumë Shtete Anëtare, me qëllimin për t’iu ofruar të gjithë shtetasve të Bashkimit kushtet më të mira të mundshme për jetesë. Nga ana tjetër, Institucionet e Bashkimit Europian nuk mund të ndërhynin në sistemet juridike të brendshme të Shteteve, më shumë sesa ishte e nevojshme.