Modernizimi urban me tipare socialiste i qyteteve tradicionale shqiptare

Abstract

Në këtë tekst, vëmendje studimore do të marrë periudha e modernizimit socialist të Shqipërisë, dhe pikërisht një nga dukuritë më përfaqësuese të saj, siç qe ajo e trajtimit të trashëgimisë urbane të së kaluarës dhe e planifikimit për rimodelimin urban të saj me tipare socialiste. Në tërësinë e tij, modernizimi urban i Shqipërisë, në periudhën pas Luftës së Dytë, u konceptua dhe u trajtuar në vazhdën e tij dyzetepesë vjeçare si një projekt politik me kumte të mirëfillta ideologjike. Filli lidhës i të gjitha dukurive urbane të periudhës së socializmit do të ishte moderniteti si vizion dhe modernizimi si mision, si dhe përpjekja për të mundësuar materializim e tyre mbi territorin dhe shoqërinë shqiptare me ndërmjetësinë e ideologjisë komuniste dhe të sistemit politik të socializmit shtetëror. Qasja ideologjike çoi në centralizimin nga ana e shtetit të të gjitha koncepteve, politikave, projekteve e nismave konkrete për trajtimit e trashëgimisë urbane të qyteteve tradicionale dhe rimodelimin urban të tyre me tendencë modernizimin, por njëkohësisht duke shkëputur lidhjet e tyre me të kaluarën.