Masat e sigurimit dhe disa aspekte të zbatimit në praktikë

Abstract

Masat e sigurimit janë veprime procedurale që heqin ose kufizojnë lirinë dhe të drejtat e personit ndaj të cilit zhvillohet procedimi penal. Ato kanë si qëllim të parandalojnë veprimtarinë e mëtejshme kriminale të atij që ka kryer një vepër penale, të pengojnë shmangien e tij nga procedimi, përpjekjet që ai mund të bëjë për të vënë në rrezik marrjen e provës ose vërtetësinë e saj, si dhe të garantojnë shlyerjen e detyrimeve që rrjedhin nga vepra penale. Liria e personit është e drejtë e mbrojtur në Kushtetutë, që mund të kufizohet vetëm me ligj, në përpjesëtim me gjendjen që ka diktuar kufizimin, për një interes publik ose për mbrojtjen e të drejtave të të tjerëve. Kufizimi nuk mund të cenojë thelbin e lirive dhe të të drejtave dhe në asnjë rast nuk mund të tejkalojë kufizimet e parashikuara në Konventën Europiane për të Drejtat e Njeriut. Masat e sigurimit aplikohen për shkaqe dhe kritere të përcaktuara në mënyrë të qartë në dispozitat e Kodit të Procedurës Penale, të cilat janë të detyrueshme për zbatim nga gjykatat e të gjitha shkallëve. Ky punim synon të paraqesë kushtet dhe kriteret për caktimin e masës së sigurimit personal, duke u ndalur në trajtimin e disa rasteve nga praktika gjyqësore, lidhur me zbatimin e drejtë të dispozitave për caktimin e masave të sigurimit. Metodologjia e përdorur në këtë punim ka të bëjë me analizën ligjore të ligjit procedural penal mbi zbatimin e masave të sigurimit, kryesisht personal, si dhe studimi dhe analiza e rasteve praktike të gjykatave tona lidhur me caktimin drejtë të masave të sigurimit personal, duke respektuar kushtet dhe kriteret e parashikuara nga ligji procedural penal.